Naat
Raunaq-e-bazm-e-jahan hain aashiqan-e-sokhta
رونقِ بزمِ جہاں ہیں عاشقانِ سوختہ
Urdu Kalam
مطلع
رونقِ بزمِ جہاں ہیں عاشقانِ سوختہ
کہہ رہی ہے شمع کی گویا زبانِ سوختہ
جس کو قرصِ مہر سمجھا ہے جہاں اے مُنعمو!
اُن کے خوانِ جُود سے ہے ایک نانِ سوختہ
ماہِ من یہ نیّرِ محشر کی گرمی تابکے
آتشِ عصیاں میں خود جلتی ہے جانِ سوختہ
برقِ انگشتِ نبی چمکی تھی اس پر ایک بار
آج تک ہے سینۂ مہ میں نشانِ سوختہ
مہر عالم تاب جھکتا ہے پئے تسلیم روز
پیشِ ذرّاتِ مزارِ بیدلانِ سوختہ
کُوچۂ گیسوئے جاناں سے چلے ٹھنڈی نسیم
بال و پر افشاں ہوں یاربّ بلبلانِ سوختہ
بہرِ حق اے بحرِ رَحمت اِک نگاہِ لطف بار
تابکے بے آب تڑپیں ماہیانِ سوختہ
رُوکش خورشید محشر ہو تمہارے فیض سے
اِک شرارِ سینۂ شیدائیانِ سوختہ
آتشِ تردامنی نے دل کیے کیا کیا کباب
خِضْر کی جاں ہو جِلا دو ماہیانِ سوختہ
آتشِ گلہائے طیبہ پر جلانے کے لئے
جان کے طالب ہیں پیارے بلبلانِ سوختہ
لطفِ برقِ جلوۂ معراج لایا وجد میں
شعلۂ جوالہ ساں ہے آسمانِ سوختہ
مقطع
اے رضاؔ مضمون سوزِ دِل کی رِفعت نے کیا
اس زمینِ سوختہ کو آسمانِ سوختہ
Kalam Details
Bahr
Bahr-e-Ramal Musamman Mahzuf
Radif
ہ
Total Ashaar
12
Total Misra
24
Writer
Aala Hazrat Imam Ahmed Raza Khan
Book
Hadaiq-e-Bakhshish