Nemat-E-Be-Badal Madinah Hai

Zabt-E-Jazbaat Lazmi Hai Yahan
Ae Mere Dil Sambhal Madinah Hai

Un Ki Aamad Ka Faiz Hai Makkah
Un Ki Hijrat Ka Phal, Madinah Hai

Gard-E-Rah Jhaarne Ki Sochta Hai?
Is Ko Chehre Pe Mal Madinah Hai

Maah-E-Shaam-E-Abad Najaf Ki Zameen
Mehr-E-Subh-E-Azal Madinah Hai

Arziyan Daal Par Nigahon Se
Apni Aadat Badal Madinah Hai

Dost! Yeh Ehtimam-E-Aks-Kashi
Khud Se Bahar Nikal, Madinah Hai

Ahl-E-Makkah Ne Jo Kiya So Kiya
Un Ka Radd-E-Amal Madinah Hai

Habt Ho Jayenge Sabhi Aamaal
La Na Mathe Pe Bal Madinah Hai

Go Keh Har Shehar Hai Madinah Magar
Shehar-E-Sarkar Al-Madinah Hai

Lab-E-Aasi Aur Izn-E-Dar-Bosi
Sang-E-Hasrat Pighal, Madinah Hai

Lab Pe Beja Machal Na Ae Khwahish
Pehle Ashkon Mein Dhal Madinah Hai

Gir Na Jaayen Zameen Par Ae Chashm!
Apne Aansu Nigal Madinah Hai

Ae Dam-E-Tez Rau Adab Malhooz
Chal To Aahista Chal Madinah Hai

Hauslay Kaise Maand Par Jaayen
Paon Kaise Hon Shal? Madinah Hai

Pesh-E-Darbar! Khwahish-E-Izhar?
Apne Armaan Kuchal Madinah Hai