Naat
Rashk-e-qamar hoon rang rukh-e-aaftab hoon
رشکِ قمر ہوں رنگ رُخِ آفتاب ہوں
Urdu Kalam
مطلع
رشکِ قمر ہُوں رنگ رُخِ آفتاب ہُوں
ذرّہ تِرا جو اے شہِ گَردُوں جناب ہُوں
دُرِّ نجف ہُوں گوہَرِ پاکِ خوشاب ہُوں
یعنی تُرابِ رہ گزر بُو تُراب ہُوں
گر آنکھ ہُوں تو اَبر کی چشم پُر آب ہُوں
دِل ہُوں تو برق کا دلِ پُر اضطراب ہُوں
خونیں جگر ہُوں طائر بے آشیاں شہا
رنگِ پریدۂ رُخِ گل کا جواب ہُوں
بے اصل و بے ثبات ہُوں بحرِ کرم مدد
پَرْوَرْدَۂ کنارِ سُراب و حَباب ہُوں
عبرت فزا ہے شرمِ گنہ سے مِرا سکوت
گویا لبِ خموشِ لحد کا جواب ہُوں
کیوں نالہ سوز لَے کروں کیوں خونِ دل پیوں
سیخِ کباب ہُوں نہ میں جامِ شراب ہُوں
دل بستہ بے قرار، جگر چاک، اشکبار
غنچہ ہوں گل ہُوں برق تپاں ہُوں سحاب ہُوں
دعویٰ ہے سب سے تیری شفاعت پہ بیشتر
دفتر میں عاصیوں کے شہا اِنتخاب ہُوں
مولیٰ دُہائی نظروں سے گِر کر جلا غلام
اشکِ مژہ رسیدۂ چشم کباب ہُوں
مِٹ جائے یہ خودی تو وہ جلوہ کہاں نہیں
دردا میں آپ اپنی نظر کا حجاب ہُوں
صَدقے ہوں اس پہ نار سے دیگا جو مخلصی
بلبل نہیں کہ آتشِ گل پر کباب ہُوں
قالب تہی کیے ہمہ آغوش ہے ہلال
اے شہسَوار طیبہ! میں تیری رکاب ہُوں
کیا کیا ہیں تجھ سے ناز تِرے قصر کو کہ میں
کعبہ کی جان، عرشِ بریں کا جواب ہُوں
شاہا بُجھے سقر مِرے اشکوں سے تانہ میں
آبِ عبث چکیدۂ چشمِ کباب ہُوں
میں تو کہا ہی چاہوں کہ بندہ ہُوں شاہ کا
پر لُطف جب ہے کہدیں اگر وہ جناب’’ہُوں ‘‘
مقطع
حسرت میں خاک بوسیِ طیبَہ کی اے رضاؔ
ٹپکا جو چشمِ مہر سے وہ خونِ ناب ہوں
Kalam Details
Bahr
Bahr-e-Hazaj
Radif
ں
Total Ashaar
17
Total Misra
34
Writer
Aala Hazrat Imam Ahmed Raza Khan
Book
Hadaiq-e-Bakhshish
Category
Naat
Topics
Madina
Makkah-o-Kaaba