Hamd
Ya ilahi har jagah teri ata ka saath ho
یاالٰہی ہر جگہ تیری عطا کا ساتھ ہو
Urdu Kalam
مطلع
یاالہٰی ہر جگہ تیری عطا کا ساتھ ہو
جب پڑے مشکل شہِ مشکل کشا کا ساتھ ہو
یاالٰہی بُھول جاؤں نزع کی تکلیف کو
شادیِ دِیدار حُسنِ مصطفیٰ کا ساتھ ہو
یاالٰہی گورِ تیرہ کی جب آئے سخت رات
اُن کے پیارے منھ کی صبحِ جانفِزا کا ساتھ ہو
یاالٰہی جب پڑے محشر میں شورِ داروگِیر
اَمن دینے والے پیارے پیشوا کا ساتھ ہو
یاالٰہی جب زبانیں باہَر آئیں پیاس سے
صاحبِ کوثر شہِ جُود و عطا کا ساتھ ہو
یاالٰہی سرد مِہری پر ہو جب خورشیدِ حشر
سیّد بے سایہ کے ظِل لوا کا ساتھ ہو
یاالٰہی گرمیِ محشر سے جب بھڑکیں بدن
دامنِ محبوب کی ٹھنڈی ہوا کا ساتھ ہو
یاالٰہی نامۂ اعمال جب کُھلنے لگیں
عیب پوشِ خلق ستّارِ خطا کا ساتھ ہو
یاالہٰی جب بہیں آنکھیں حسابِ جُرم میں
اُن تبسّم ریز ہونٹوں کی دُعا کا ساتھ ہو
یاالہٰی جب حسابِ خندئہ بیجا رُلائے
چشمِ گریانِ شفیعِ مُرتجٰے کا ساتھ ہو
یاالہٰی رنگ لائیں جب مِری بے باکیاں
اُن کی نیچی نیچی نظروں کی حیا کا ساتھ ہو
یاالہٰی جب چلوں تاریک راہِ پُل صِراط
آفتابِ ہاشمی نُور الہُدیٰ کا ساتھ ہو
یاالہٰی جب سرِ شمشیر پر چلنا پڑے
رَبِّ سَلِّم ْکہنے والے غمزِدا کا ساتھ ہو
یاالہٰی جو دُعائے نیک میں تجھ سے کروں
قُدسیوں کے لب سے آمیںرَبَّنَا کا ساتھ ہو
مقطع
یاالہٰی جب رضاؔ خوابِ گِراں سے سر اُٹھائے
دولتِ بیدارِ عشقِ مصطفیٰ کا ساتھ ہو
Kalam Details
Bahr
Bahr-e-Ramal Musamman Mahzoof
Radif
و
Total Ashaar
15
Total Misra
30
Writer
Aala Hazrat Imam Ahmed Raza Khan
Book
Hadaiq-e-Bakhshish