Arsh-e-Haq Hai Masnad-e-Rif’at Rasool Allah Ki

Qabr Mein Lehrayenge Ta Hashr Chashme Noor Ke
Jalwa Farma Hogi Jab Tal'at Rasool Allah Ki

Kafiron Par Tegh-e-Wala Se Giri Barq-e-Ghazab
Abr Aasa Chha Gayi Haibat Rasool Allah Ki

La Wa Rabbil Arsh Jis Ko Jo Mila Un Se Mila
Batti Hai Kaunain Mein Ne'mat Rasool Allah Ki

Woh Jahannam Mein Gaya Jo Un Se Mustaghni Hua
Hai Khalilullah Ko Hajat Rasool Allah Ki

Sooraj Ulatay Paaon Paltay Chand Ishare Se Ho Chaak
Andhay Najdi Dekh Le Qudrat Rasool Allah Ki

Tujh Se Aur Jannat Se Kya Matlab Wahabi Door Ho
Hum Rasool Allah Ke Jannat Rasool Allah Ki

Zikr Roke Fazl Kaate Naqs Ka Joyan Rahe
Phir Kahe Mardak Keh Hoon Ummat Rasool Allah Ki

Najdi Us Ne Tujh Ko Muhlat Di Keh Is Aalam Mein Hai
Kafir O Murtad Pe Bhi Rahmat Rasool Allah Ki

Hum Bhikari Woh Karim Un Ka Khuda Un Se Fuzoon
Aur Na Kehna Nahin Aadat Rasool Allah Ki

Ahl-e-Sunnat Ka Hai Bera Paar Ashab-e-Huzoor
Najm Hain Aur Nao Hai Itrat Rasool Allah Ki

Khaak Ho Kar Ishq Mein Aaram Se Sona Mila
Jaan Ki Ikseer Hai Ulfat Rasool Allah Ki

Toot Jayenge Gunahgaron Ke Foran Qaid-o-Band
Hashr Ko Khul Jayegi Taqat Rasool Allah Ki

Ya Rabb Ik Sa'at Mein Dhul Jayen Siyahkaron Ke Jurm
Josh Mein Aa Jaye Ab Rahmat Rasool Allah Ki

Hai Gul-e-Bagh-e-Qudus Rukhsar-e-Zaibaye Huzoor
Sarv-e-Gulzar-e-Qadam Qamat Rasool Allah Ki