Gham Ho Gaye Be Shumaar Aaqa

Bigra Jaata Hai Khel Mera
Aaqa Aaqa Sanwaar Aaqa

Manjhdhaar Pe Aa Ke Nao Tooti
De Haath Keh Hoon Main Paar Aaqa

Tooti Jaati Hai Peeth Meri
Lillahi Yeh Bojh Utaar Aaqa

Halka Hai Agar Hamaara Pallah
Bhaari Hai Tera Waqaar Aaqa

Majboor Hain Hum To Fikr Kya Hai
Tum Ko To Hai Ikhtiyaar Aaqa

Main Door Hoon Tum To Ho Mere Paas
Sun Lo Meri Pukaar Aaqa

Mujh Sa Koi Ghamzadah Na Hoga
Tum Sa Nahin Gham Gusaar Aaqa

Gardaab Mein Par Gayi Hai Kashti
Dooba Dooba, Utaar Aaqa

Tum Woh Keh Karam Ko Naaz Tum Se
Main Woh Keh Badi Ko Aar Aaqa

Phir Munh Na Pare Kabhi Khizaan Ka
De De Aisi Bahaar Aaqa

Jis Ki Marzi Khuda Na Taale
Mera Hai Woh Naamdaar Aaqa

Hai Mulk-e-Khuda Pe Jis Ka Qabzah
Mera Hai Woh Kaamgaar Aaqa

Soya Kiye Naabakaar Bande
Roya Kiye Zaar Zaar Aaqa

Kya Bhool Hai Un Ke Hote Kehlaaen
Duniya Ke Yeh Taajdaar Aaqa

Un Ke Adna Gada Pe Mit Jaayen
Aise Aise Hazaar Aaqa

Be Abr-e-Karam Ke Mere Dhabbe
La Taghsiluhal Bihaar Aaqa