Barhween Tareekh

Jalen Woh Jin Ke Muqaddar Mein Aag Likhi Hai
Hamein To Bais-e-Rahmat Hai Barhween Tareekh

Yeh Roz-o-Shab Yeh Mah-o-Saal Jin Ka Sadqah Hain
Unhin Ka Yaum-e-Wiladat Hai Barhween Tareekh

Woh Subah Jab Ke Habib-e-Khuda Huye Paida
Usi Sehar Ki Alamat Hai Barhween Tareekh

Khuda Ke Fazl Se Hum Sunniyon Ko Pyari Hai
Saadaton Ki Zamanat Hai Barhween Tareekh

Woh Rat Jage Woh Nawafil Durood Aur Salam
Hamare Piron Ki Sunnat Hai Barhween Tareekh

Abu Lahab Ko Saza Mein Kami Mile Us Din
Saboot-e-Rutba-e-Nisbat Hai Barhween Tareekh

Shafi-e-Roz-e-Jaza Jin Ka Wasf-e-Aqdas Hai
Unhin Ki Shan Ki Shaukat Hai Barhween Tareekh

Shab-e-Wiladat-e-Ahmad Ki Subah Kya Kahiye
Bahar-e-Fazl-o-Fazilat Hai Barhween Tareekh

Hamein To Nazmi Sikhaya Yahi Buzurgon Ne
Ke Sunniyon Ki Saadat Hai Barhween Tareekh