Naat
Taab-e–e-mraati-e-sahar Gard-e–e-biyaabaan-e-Arab
تابِ مرآتِ سحر گردِ بیابانِ عرب
Urdu Kalam
مطلع
تابِ مرآتِ سحر گردِ بیابانِ عرب
غازۂ روئے قمر دودِ چراغانِ عرب
اللہ اللہ بہارِ چمنستانِ عرب
پاک ہیں لَوثِ خزاں سے گُل و رَیحانِ عرب
جوشِش ابر سے خونِ گلِ فردوس کرے
چھیڑ دے رگ کو اگر خارِ بیابانِ عرب
تشنۂ نہرِ جِناں ہر عربی و عجمی!
لبِ ہر نہرِ جِناں تشنۂ نیسانِ عرب
طوقِ غم آپ ہوائے پرِ قمری سے گرے
اگر آزاد کرے سروِ خرامانِ عرب
مہر میزاں میں چھپا ہو تو حمل میں چمکے
ڈالے اِک بوند شبِ دے میں جو بارانِ عرب
عرش سے مژدۂ بلقیسِ شفاعت لایا
طائرِ سدرہ نشیں مرغِ سلیمانِ عرب
حسنِ یوسف پہ کٹیں مصر میں انگشتِ زناں
سر کٹاتے ہیں تِرے نام پہ مردانِ عرب
کوچے کوچے میں مہکتی ہے یہاں بوئے قمیص
یوسفستاں ہے ہر اِک گوشۂ کنعانِ عرب
بزمِ قدسی میں ہے یادِ لبِ جاں بخش حضور
عالمِ نور میں ہے چشمۂ حیوانِ عرب
پائے جبریل نے سرکار سے کیا کیا اَلقاب
خسروِ خیلِ مَلک خادمِ سلطانِ عرب
بلبل و نیلپر و کبک بنو پروانو!
مہ و خورشید پہ ہنستے ہیں چراغانِ عرب
حور سے کیا کہیں موسیٰ سے مگر عرض کریں
کہ ہے خود حسنِ ازل طالبِ جانانِ عرب
مقطع
کرمِ نعت کے نزدیک تو کچھ دور نہیں
کہ رضائے عجمی ہو سگِ حسّانِ عرب
Kalam Details
Bahr
Bahr-e-Rajaz Musamman Matwi Makhboon
Arkaan
مفتَعِلن مفاعلن مفتَعِلن مفاعلن
Radif
عرب
Zameen
بحر: رجز مثمن مطوی مخبون؛ ردیف: عرب
Sanf
نعت
Script
Urdu
Total Misra
28
Writer
Aala Hazrat Imam Ahmad Raza Khan
Book
Hadaiq-e-Bakhshish