Naat
Ilahi Rauza-e–e-khaeeruaalbashar Par Mein Agar Jaun
الہٰی روضۂ خیرالبشر پر میں اگر جاؤں
Urdu Kalam
مطلع
الہٰی روضۂ خیرالبشر پر میں اگر جاؤں
تو اک سجدہ کروں ایسا کہ آپے سے گزر جاؤں
نجاتِ آخرت کا اس قدر ساماں کر جاؤں
کہ طیبہ جاکے اک سجدہ کروں سجدے میں مرجاؤں
مدینے جانے والے سر کے بل جاتے ہیں جانے دو
مرے قسمت میں ہو جانا تو بارنگِ دِگر جاؤں
اڑادوں سب سے پہلے طائر جاں اس طرف اپنا
سہارے سے اسی طائر کے پھر بے بال و پر جاؤں
کبھی روضے سے منبر تک کبھی منبر سے روضے تک
اِدھر جاؤں اُدھر جاؤں اسی حالت میں مرجاؤں
سگانِ کوچۂ دلدار کی پیہم بلائیں لوں
تماشا بن کے رہ جاؤں مدینے میں جدھر جاؤں
میں کچھ درِّ شفاعت لےکے لوٹوں چشمِ رحمت کے
جو دربارِ معالی میں کبھی باچشمِ تر جاؤں
تمہارے نام لیوا بےخطر جاتے ہیں محشر میں
اشارہ ہو اگر مجھکو تو میں بھی بے خطر جاؤں
توجہ ان کرم پرور نگاہوں کی جو ہوجائے
مرا ایماں سنور جائے میں ایماں سے سنور جاؤں
سمجھ کر کوچۂ جاناں میں جنت میں چلا آیا
کوئے جاناں تو طیبہ ہے میں جاؤں تو کدھر جاؤں
مقطع
خلیؔل اب زاد راہِ آخرت کی سعی احسن میں
مدینے سر کے بل جاؤں وہاں پہنچوں تو مرجاؤں
Kalam Details
Bahr
Bahr-e-Hazaj Musamman Salim
Arkaan
مفاعیلن مفاعیلن مفاعیلن مفاعیلن
Radif
جاؤں
Zameen
بحر: ہزج مثمن سالم؛ ردیف: جاؤں
Sanf
نعت
Script
Urdu
Total Misra
22
Writer
Mufti Muhammad Khaleel Barkati
Book
Jamal-e-Khaleel