Naat
Tum Par Nisaar Hone Ko Aayi He Chandni
تم پر نثار ہونے کو آئی ھے چاندنی
Urdu Kalam
مطلع
تم پر نثار ہونے کو آئی ھے چاندنی
تاروں کے پھول نذر کو لائی ہے چاندنی
اے نازنینِ حقﷺ! تِری بزمِ جمال سے
سورج نے دھوپ چاند نے پائی ہے چاندنی
یاد آگئی ہے تابشِ رخسارِ مصطفیٰﷺ
کیا سرد آگ دِل میں لگائی ہے چاندنی
وہ لب کُھلے کہ نور کا چشمہ اُبل پڑا
وہ مسکرا دئے ہیں کہ چھائی ہے چاندنی
طیبہ کی خاک سے پئے کسبِ تجلیات
گردوں سے فرش پر اُتر آئی ہے چاندنی
کرنا سلام عرض مدینے کے چاندﷺ سے
تابابِ نور تیری رسائی ہے چاندنی
شاید ملا ہے غازۂ خاکِ درِ حبیبﷺ
کیا تیرا روپ تیری صفائی ہے چاندنی
تو اپنی چاندنی مہِ کامل سمیٹ لے
مجھ کو تو رب کے چاند کی بھائی ہے چاندنی
وہ ذرّہ بن کے ماہِ مبیں ضوفشاں ہوا
جس نے خدا کے چاند سے پائی ہے چاندنی
روشن ہے تجھ سے شب‘ تو جمالِ حبیبﷺ سے
میں نے بھی بزمِ نعت سجائی ہے چاندنی
مقطع
اختؔر ہے تابناک ہر اِک گوشۂ حیات
ماہِ عرب کی دل میں سمائی ہے چاندنی
Kalam Details
Bahr
Bahr-e-Muzare Musamman Akhrab Makfoof Mahzoof
Arkaan
مفعول فاعلاتُ مفاعیل فاعلن
Radif
چاندنی
Zameen
بحر: مضارع مثمن اخرب مکفوف محذوف؛ ردیف: چاندنی
Sanf
نعت
Script
Urdu
Total Misra
22
Writer
Syed Marghoob Akhtar Al-Hamidi
Book
Naat Mahal