Naat
Yaad Mein Jis Ki Nahin Hoosh-e-tan O Jaan Hum Ko
یاد میں جس کی نہیں ہوشِ تن و جاں ہم کو
Urdu Kalam
مطلع
یاد میں جس کی نہیں ہوشِ تن و جاں ہم کو
پھر دکھا دے وہ رخ اے مہر ِفروزاں ہم کو
دیر سے آپ میں آنا نہیں ملتا ہے ہمیں
کیا ہی خود رفتہ کیا جلوۂ جاناں ہم کو
جس تبسّم نے گلستاں پہ گرائی بجلی
پھر دکھا دے وہ ادائے گُلِ خنداں ہم کو
کاش آویزۂ قندیلِ مدینہ ہو وہ دل
جس کی سوزش نے کیا رشکِ چراغاں ہم کو
عرش جس خوبیِ رفتار کا پامال ہوا
دو قدم چل کے دکھا سروِ خراماں ہم کو
شمعِ طیبہ سے میں پروانہ رہوں کب تک دور
ہاں جَلا دے شرِرِ آتشِ پنہاں ہم کو
خوف ہے سمع خراشیِّ سگِ طیبہ کا
ورنہ کیا یاد نہیں نالۂ و افغاں ہم کو
خاک ہو جائیں درِ پاک پہ حسرت مٹ جائے
یا الٰہی! نہ پھرا بے سر و ساماں ہم کو
خارِ صحرائے مدینہ نہ نکل جائے کہیں
وحشتِ دل نہ پھرا کوہ و بیاباں ہم کو
تنگ آئے ہیں دو عالَم تِری بے تابی سے
چین لینے دے تپِ سینۂ سوزاں ہم کو
پاؤں غربال ہوئے راہِ مدینہ نہ ملی
اے جنوں اب تو ملے رخصتِ زنداں ہم کو
میرے ہر زخمِ جگر سے یہ نکلتی ہے صدا
اے ملیحِ عربی کر دے نمک داں ہم کو
سیرِ گلشن سے اسیرانِ قفس کو کیا کام
نہ دے تکلیف چمن بلبلِ بستاں ہم کو
جب سے آنکھوں میں سمائی ہے مدینے کی بہار
نظر آتے ہیں خزاں دیدہ گلستاں ہم کو
گر لبِ پاک سے اقرارِ شفاعت ہو جائے
یوں نہ بے چین رکھے جوششِ عصیاں ہم کو
نیّرِ حشر نے اِک آگ لگا رکھی ہے!
تیز ہے دھوپ ملے سایۂ داماں ہم کو
رحم فرمائیے یا شاہ! کہ اب تاب نہیں
تابکے خون رلائے غمِ ہجراں ہم کو
چاک داماں میں نہ تھک جائیو، اے دستِ جنوں!
پُرزے کرنا ہے ابھی جیب و گریباں ہم کو
پردہ اُس چہرۂ انور سے اٹھا کر اِک بار
اپنا آئینہ بنا، اے مہِ تاباں! ہم کو
اے رؔضا! وصفِ رُخِ پاک سنانے کے لیے
نذر دیتے ہیں چمن مُرغِ غزل خواں ہم کو
مقطع
حدائقِ بخشش
Kalam Details
Bahr
Bahr-e-Ramal Musamman Makhboon Mahzoof Maqtoo
Arkaan
فاعلاتن فَعِلاتن فَعِلاتن فِعْلن
Radif
ہم کو
Zameen
بحر: رمل مثمن مخبون محذوف مقطوع؛ ردیف: ہم کو
Sanf
نعت
Script
Urdu
Total Misra
41
Writer
Aala Hazrat Imam Ahmad Raza Khan
Book
Hadaiq-e-Bakhshish