جوش میں آگئی رحمتِ کبریا ہم غریبوں کے حاجت روا آگئے

غم کے ماروں کے غم دور ہونے لگے شور اُٹھا کہ مشکل کشا آگئے

ابرِ رحمت مسلسل برسنے لگا دِل کے پژ مُردہ غنچے مہکنے لگے

مونسِ بیکساں ہادئ گمر ہاں کشتئ نوح کے ناخدا آگئے

بے نِشانوں کو اپنے نشاں مِل گئے نامرادوں کو دُونوں جہاں مِل گئے

کُنتُ کنزًا کا خلوت کدہ چھوڑ کر بزم ہستی میں خیر الوری آگئے

آفتاب ِ رسالت درخشاں ہوا دُور دنیا سے سارا اندھیرا ہوا

ذِکر سے ان کے دل جگمگانے لگا لیکے انوار نور الہُدیٰ آگئے