Suraj Chamak Rahe The Badi Aab-o-Taab Se

Tishna zameen, lab pe huroof-e-dua liye
Reh reh ke dekhti thi khule aasman ko
Barsain gi kab ghataayein karam ki rosh rosh
Hongi naseeb raahatein kab do jahan ko

Phir yun hua ke ek din is kainaat par
Barsa sahaab-e-rahmat-e-parwardigar ka
Aaye Huzoor ﷺ, roshni qadmon mein gir padi
Mausam adab se khatam hua intezaar ka

Jhootay khuda, Khuda ki Khudai mein gum huye
Har zi-nufus ko adl ki zanjeer mil gayi
Tauheed ke, zameen pe utar aaye aftaab
Insaan ko apne khwab ki tabeer mil gayi

Arz-o-sama mein jashn-e-wiladat ki dhoom thi
Meelaad parh rahe the farishte Huzoor ﷺ ka
Ram jham durood-e-paak ki jaari fiza mein thi
Charcha tha kainaat mein Qudsi zuhoor ka

Aaye mere Huzoor ﷺ to rooye zameen par
Tehzeeb ko shu’oor-e-tamaddun ata hua
Bunyaad, inqilab-e-karam ki rakhi gayi
Sadiyon ka qarz aaj ke din tha ada hua

Youm-e-nijaat no'e bashar ka, yahi hai din
Is din ke sar pe taaj hai Umm-ul-Kitaab ka
Arsh-e-bareen se farsh-e-zameen tak qadam qadam
Parcham khula hua hai Risaalat Ma'ab ﷺ ka

Meelaad-e-Mustafa ﷺ ke chamanzaar mein, Riaz
Aabaad qalb-o-jaan hon durood-o-salaam se
Shukr-e-Khuda ke baad mere khushnawa qalam!
Ism-e-Huzoor ﷺ lab pe sajaa ehteram se

Har har ufaq pe chaand sitaaron ne yeh likha
Duniya mein ab rahega savera Huzoor ﷺ ka
Ab doosri kisi ki qiyaadat nahi qabool
Ab hashr tak urey ga phareera Huzoor ﷺ ka