Phir ke gali gali tabah thokaren sab ki khaye kyun

Rukhsat-e-qafila ka shor ghash se hamein uthaye kyun
Sote hain un ke sayah mein koi hamein jagaye kyun

Bar na the Habib ko paalte hi ghareeb ko
Royein jo ab naseeb ko chain kaho ganwaye kyun

Yaad-e-Huzoor ki qasam ghaflat-e-aish hai sitam
Khoob hain qaid-e-gham mein hum koi hamein chhuraye kyun

Dekh ke Hazrat-e-Ghani phel pade faqeer bhi
Chhayi hai ab to chhaoni hashr hi aane jaye kyun

Jaan hai Ishq-e-Mustafa roz fazoon kare Khuda
Jis ko ho dard ka maza naaz-e-dawa uthaye kyun

Hum to hain aap dil figar gham mein hansi hai nagawar
Chher ke gul ko nau bahar khoon hamein rulaye kyun

Ya to yun hi tadap ke jayein ya wohi daam se chhurayein
Minnat-e-ghair kyun uthayein koi taras jataye kyun

Un ke jalal ka asar dil se lagaye hai qamar
Jo ke ho loot zakhm par dagh-e-jigar mitaye kyun

Khush rahe gul se andaleeb khar-e-haram mujhe naseeb
Meri bala bhi zikr par phool ke khar khaye kyun

Gard-e-malal agar dhule dil ki kali agar khile
Barq se aankh kyun jale rone pe muskuraye kyun

Jaan-e-safar naseeb ko kis ne kaha maze se so
Khatka agar sahar ka ho shaam se maut aaye kyun

Ab to na rok ae Ghani aadat-e-sag bigad gayi
Mere Kareem pehle hi luqma-e-tar khilaye kyun

Rah-e-Nabi mein kya kami farsh-e-bayaz-e-deedah ki
Chadar-e-zill hai malgaji zer-e-qadam bichhaye kyun

Sang-e-dar-e-Huzoor se hum ko Khuda na sabr de
Jana hai sar ko ja chuke dil ko qarar aaye kyun