Phir utha walwala-e-yad-e-Mugheelan-e-Arab

Bagh-e-Firdaus ko jaate hain Hazaran-e-Arab
Haye Sehra-e-Arab, Haye Bayaban-e-Arab

Meethi baatein teri deen-e-Ajam, iman-e-Arab
Namkeen husn tera jaan-e-Ajam, shan-e-Arab

Ab to hai girya-e-khoon gauhar-e-daman-e-Arab
Jis mein do laal the Zahra ke woh thi kan-e-Arab

Dil wohi dil hai jo aankhon se ho hairan-e-Arab
Aankhen woh aankhen hain jo dil se hon qurban-e-Arab

Haye kis waqt lagi phans alam ki dil mein
Ke bahut door rahe khar-e-Mugheelan-e-Arab

Fasl-e-gul lakh na ho, wasl ki rakh aas hazar
Phoolte phalte hain be-fasl Gulistan-e-Arab

Sadqe hone ko chale aate hain lakhon gulzar
Kuch ajab rang se phoola hai Gulistan-e-Arab

Andaleebi pe jhagarte hain, kate marte hain
Gul o Bulbul ko ladata hai Gulistan-e-Arab

Sadqe rehmat ke kahan phool kahan khar ka kaam
Khud hai daman-kash-e-Bulbul Gul-e-Khandan-e-Arab

Shadi-e-Hashr hai sadqe mein chhutenge qaidi
Arsh par dhoom se hai dawat-e-Mehman-e-Arab

Charche hote hain ye kumhlaye hue phoolon mein
Kyun ye din dekhte paate jo Bayaban-e-Arab

Tere be-daam ke bande hain Raeesan-e-Ajam
Tere be-daam ke bandi hain Hazaran-e-Arab