Pesh-e-Haq muzhdah-e-shafa’at ka sunate jayenge

Dil nikal jane ki ja hai aah kin aankhon se woh
Hum se pyason ke liye darya bahate jayenge

Kushtagan-e-garmi-e-mahshar ko woh jaan-e-Masih
Aaj daman ki hawa de kar jilate jayenge

Gul khilega aaj yeh un ki naseem-e-faiz se
Khoon rote aayenge hum muskurate jayenge

Haan chalo hasrat-zado sunte hain woh din aaj hai
Thi khabar jis ki ke woh jalwa dikhate jayenge

Aaj Eid-e-Aashiqan hai gar Khuda chahe ke woh
Abroo-e-paiwastah ka aalam dikhate jayenge

Kuch khabar bhi hai faqeero aaj woh din hai ke woh
Nemat-e-Khuld apne sadqe mein lutate jayenge

Khak uftado bas un ke aane hi ki der hai
Khud woh gir kar sajde mein tum ko uthate jayenge

Wus'aten di hain Khuda ne daman-e-Mahboob ko
Jurm khulte jayenge aur woh chhupate jayenge

Lo woh aaye muskurate hum aseeron ki taraf
Khirman-e-isyan par ab bijli girate jayenge

Aankh kholo ghamzado dekho woh giryan aaye hain
Lauh-e-dil se naqsh-e-gham ko ab mitate jayenge

Sokhtah janon pe woh pur josh rahmat aaye hain
Aab-e-Kausar se lagi dil ki bujhate jayenge

Aaftab un ka hi chamkega jab auron ke chiragh
Sarsar-e-josh-e-bala se jhilmilate jayenge

Paye kooban pul se guzrenge teri aawaz par
Rabbi Sallim ki sada par wajd late jayenge

Sarwar-e-Deen lije apne natawanon ki khabar
Nafs o Shaitan Sayyida kab tak dabate jayenge

Hashr tak dalenge hum paidaish-e-Maula ki dhoom
Misl-e-Faris Najd ke qilay girate jayenge