Tira zarrah mah-e-kamil hai ya Ghaus

Koi saalik hai ya waasil hai ya Ghaus
Woh kuchh bhi ho tira sa'il hai ya Ghaus

Qad-e-be-saayah zill-e-kibriya hai
Tu us be-saayah zill ka zill hai ya Ghaus

Tiri jageer mein hai sharq ta gharb
Qalamrau mein haram ta hill hai ya Ghaus

Dil-e-ishq o rukh-e-husn aaeena hain
Aur in donon mein tira zill hai ya Ghaus

Tiri shama-e-dil-aara ki tab-o-taab
Gul o bulbul ki aab o gil hai ya Ghaus

Tira Majnun tira sahra tira Najd
Tiri Laila tira mahmil hai ya Ghaus

Yeh tiri champai rangat-e-Husaini
Hasan ke chand subh-e-dil hai ya Ghaus

Gulistan-zar tiri pankhri hai
Kali so khuld ka haasil hai ya Ghaus

Ugaal us ka udhaar abraar ka ho
Jise tira ulush haasil hai ya Ghaus

Isharah mein kiya jis ne qamar chaak
Tu us mah ka mah-e-kamil hai ya Ghaus

Jise arsh-e-doem kehte hain aflaak
Woh tiri kursi-e-manzil hai ya Ghaus

Tu apne waqt ka Siddiq-e-Akbar
Ghani o Haidar o Aadil hai ya Ghaus

Wali kya mursal aaen khud huzoor aaen
Woh tiri waaz ki mahfil hai ya Ghaus

Jise maange na paen jaah wale
Woh bin maange tujhe haasil hai ya Ghaus

Fuyuz-e-Aalam-e-Ummi se tujh par
Iyaan maazi o mustaqbil hai ya Ghaus

Jo qarnon sair mein aarif na paen
Woh tiri pehli hi manzil hai ya Ghaus

Malak mashghool hain us ki sana mein
Jo tira zaakir o shaaghil hai ya Ghaus

Na kyun ho tiri manzil arsh-e-sani
Ke arsh-e-haq tiri manzil hai ya Ghaus

Waheen se uble hain saaton samandar
Jo tiri nehr ka saahil hai ya Ghaus

Malaaik ke bashar ke jinn ke halqe
Tiri zau mah-e-har manzil hai ya Ghaus

Bukhara o Iraq o Chisht o Ajmer
Tiri lau shama-e-har mahfil hai ya Ghaus

Jo tira naam le zaakir hai pyare
Tasawwur jo kare shaaghil hai ya Ghaus

Jo sar de kar tira sauda khareede
Khuda de aql woh aaqil hai ya Ghaus