Paat woh kuch dhaar yeh kuch zaar hum

Kis bala ki mai se hain sarshaar hum
Din dhala hote nahin hoshyar hum

Tum karam se mushtari har aib ke
Jins-e-namaqbool har bazaar hum

Dushmanon ki aankh mein bhi phool tum
Doston ki bhi nazar mein khaar hum

Laghzish-e-paa ka sahara ek tum
Girne wale lakhon naahenjaar hum

Sadqah apne baazuon ka al-madad
Kaise torein yeh but-e-pindaar hum

Dam qadam ki khair ae Jaan-e-Maseeh
Dar pe laaye hain dil-e-beemar hum

Apni rehmat ki taraf dekhein Huzoor
Jaante hain jaise hain badkaar hum

Apne mehmaanon ka sadqah ek boond
Mar mite pyaase idhar Sarkaar hum

Apne koocha se nikala to na do
Hain to had bhar ke khudaai khwaar hum

Haath utha kar ek tukda ae Kareem
Hain sakhi ke maal mein haqdaar hum

Chaandni chhatki hai un ke noor ki
Aao dekhein sair-e-Toor o Naar hum

Himmat ae za'f un ke dar par gir ke hon
Be-takalluf saaya-e-deewaar hum

Baa-ata tum Shah tum Mukhtaar tum
Be-nawa hum zaar hum naachaar hum

Tum ne to laakhon ko jaanen pher deen
Aisa kitna rakhte hain aazaar hum

Apni sattaari ka Ya Rab waastah
Hon na ruswa bar sar-e-darbaar hum

Itni arz-e-aakhiri keh do koi
Nao tooti aa pade manjhdhaar hum

Munh bhi dekha hai kisi ke afw ka
Dekh o isyaan nahin be-yaar hum

Main nisaar aisa musalmaan keeje
Tod daalen nafs ka zunnar hum

Kab se phailaaye hain daaman tegh-e-ishq
Ab to paayen zakhm daaman-daar hum

Sunniyat se khatke sab ki aankh mein
Phool ho kar ban gaye kya khaar hum

Naatwaani ka bhala ho ban gaye
Naqsh-e-paaye taalibaan-e-yaar hum

Dil ke tukde nazr-e-haazir laaye hain
Ae sagaan-e-koocha-e-dildaar hum

Qismat-e-Thawr o Hira ki hirs hai
Chaahte hain dil mein gehra ghaar hum

Chashm-poshi o karam shaan-e-shuma
Kaar-e-maa be-baaki o israar hum

Fasl-e-gul sabzah saba masti shabaab
Chhodein kis dil se dar-e-khummaar hum

Maikadah chhootta hai Lillah saaqiya
Ab ke saaghar se na hon hoshyar hum

Saaqi-e-Tasneem jab tak aa na jaayen
Ae siyah masti na hon hoshyar hum

Naazishein karte hain aapas mein malak
Hain ghulaamaan-e-Shah-e-Abraar hum

Lutf-e-az khud raftagi Ya Rab naseeb
Hon shaheed-e-jalwa-e-raftaar hum