Rashk-e-Qamar hoon rang-e-rukh-e-Aaftaab hoon

Durr-e-Najaf hoon Gohar-e-Paak-e-Khushab hoon
Yani Turab-e-Rah Guzar Bu Turab hoon

Gar aankh hoon to abr ki chashm-e-pur-aab hoon
Dil hoon to barq ka dil-e-pur-iztiraab hoon

Khooneen jigar hoon tair-e-be-aashiyaan Shaha
Rang-e-paridah-e-rukh-e-gul ka jawab hoon

Be-asl-o-be-sabaat hoon Bahr-e-Karam madad
Parwardah-e-kinar-e-saraab-o-habaab hoon

Ibrat-fiza hai sharm-e-gunah se mera sukoot
Goya lab-e-khamosh-e-lahad ka jawab hoon

Kyun nala soz lay karoon kyun khoon-e-dil piyoon
Seekh-e-kabaab hoon na main jaam-e-sharaab hoon

Dil-bastah be-qarar, jigar chaak, ashkbaar
Ghunchah hoon gul hoon barq-e-tapaan hoon sahaab hoon

Da'wa hai sab se teri shafa'at pe beshtar
Daftar mein aasiyon ke Shaha intikhaab hoon

Maula duhaai nazron se gir kar jala ghulaam
Ashk-e-mizha rasidah-e-chashm-e-kabaab hoon

Mit jaaye ye khudi to woh jalwah kahaan nahin
Darda main aap apni nazar ka hijaab hoon

Sadqe hoon us pe naar se dega jo mukhlisi
Bulbul nahin ke aatish-e-gul par kabaab hoon

Qaalib tahi kiye hamah aaghosh hai hilaal
Aye Shahsawaar-e-Taibah! Main teri rikaab hoon

Kya kya hain tujh se naaz tere qasr ko ke main
Ka'bah ki jaan, Arsh-e-Bareen ka jawab hoon

Shaha bujhe saqar mere ashkon se ta na main
Aab-e-abas chakidah-e-chashm-e-kabaab hoon

Main to kaha hi chahoon ke banda hoon Shah ka
Par lutf jab hai keh den agar woh Janaab "hoon"