Hajiyo! Aao Shehenshah ka Roza Dekho

Rukn-e-Shami se miti wahshat-e-shaam-e-ghurbat
Ab Madina ko chalo subh-e-dil-aara dekho

Aab-e-Zamzam to piya khoob bujhaein pyasen
Aao jood-e-Shah-e-Kausar ka bhi darya dekho

Zair-e-Meezab mile khoob karam ke chhinte
Abr-e-Rahmat ka yahan zor barasna dekho

Dhoom dekhi hai dar-e-Kaaba pe betaabon ki
Un ke mushtaqon mein hasrat ka tarapna dekho

Misl-e-Parwana phira karte the jis shama ke gird
Apni us shama ko parwana yahan ka dekho

Khoob aankhon se lagaya hai ghilaf-e-Kaaba
Qasr-e-Mehboob ke parde ka bhi jalwa dekho

Waan matee'on ka jigar khauf se pani paaya
Yaan siyahkaron ka daman pe machalna dekho

Awwaleen khana-e-Haq ki to ziyaein dekhin
Aakhireen bait-e-Nabi ka bhi tajalla dekho

Zeenat-e-Kaaba mein tha lakh arooson ka banaao
Jalwa farma yahan kaunain ka dulha dekho

Aiman-e-Toor ka tha rukn-e-Yamani mein furogh
Shola-e-Toor yahan anjuman-aara dekho

Mehr-e-madar ka maza deti hai aaghosh-e-Hateem
Jin pe maan baap fida yaan karam un ka dekho

Arz-e-Hajat mein raha Kaaba kafeel-e-injaah
Aao ab daad-rasi-e-Shah-e-Taiba dekho

Dho chuka zulmat-e-dil bosah-e-Sang-e-Aswad
Khaak-boosi-e-Madina ka bhi rutba dekho

Kar chuki rif'at-e-Kaaba pe nazar parwazen
Topi ab thaam ke khaak-e-dar-e-wala dekho

Be-niyazi se wahan kaanpti paayi ta'at
Josh-e-Rahmat pe yahan naaz-e-gunah ka dekho

Jumu'a-e-Makka tha Eid ahl-e-ibadat ke liye
Mujrimo! Aao yahan Eid-e-Doshanbah dekho

Multazam se to gale lag ke nikale armaan
Adab o shauq ka yaan baaham ulajhna dekho

Khoob Masa'ee mein ba-umeed-e-Safa daur liye
Rah-e-Janaan ki safa ka bhi tamasha dekho

Raqs-e-Bismil ki baharein to Mina mein dekhin
Dil-e-khoon-nabah-fishan ka bhi tarapna dekho