Kharab haal kiya dil ko pur-malaal kiya

Na rooye gul abhi dekha na booye gul soonghi
Qaza ne la ke qafas mein shikasta baal kiya

Woh dil ke khoon shudah armaan the jis mein mil dala
Fughan ke gor-e-shaheedan ko paa-e-maal kiya

Yeh raaye kya thi wahan se palatne ki ae nafs
Sitamgar ulti chhuri se hamein halaal kiya

Yeh kab ki mujh se adawat thi tujh ko ae zaalim
Chhuda ke sang-e-dar-e-paak sar wabaal kiya

Chaman se phenk diya aashiyana-e-bulbul
Ujaara khana-e-bekas bara kamaal kiya

Tira sitam-zadah aankhon ne kya bigaara tha
Yeh kya samaai ke door un se woh jamaal kiya

Huzoor un ke khayaal-e-watan mitana tha
Hum aap mit gaye achha faraagh baal kiya

Na ghar ka rakha na us dar ka haaye nakaami
Hamari bebasi par bhi na kuch khayaal kiya

Jo dil ne mar ke jalaya tha mannaton ka charagh
Sitam ke arz-e-rah-e-sarsar zawaal kiya

Madinah chhor ke veerana Hind ka chhaya
Yeh kaisa haaye hawason ne ikhtilaal kiya

Tu jis ke waaste chhor aaya Taiba sa mehboob
Bata to us sitam-aara ne kya nihaal kiya

Abhi abhi to chaman mein the chahchahe naagah
Yeh dard kaisa utha jis ne ji nidhaal kiya