Chaman-e-Taiba mein sunbul jo sanwaare gesu

Ki jo baalon se tere Rauzah ki jaaroob-kashi
Shab ko shabnam ne tabarruk ko hain dhaare gesu

Hum siyah kaaron pe Ya Rabb tapish-e-mahshar mein
Saayah-afgan hon tere pyaare ke pyaare gesu

Charche hooron mein hain dekho to zara baal-e-Buraaq
Sunbul-e-Khuld ke qurbaan utaare gesu

Aakhir-e-Hajj gham-e-ummat mein pareshaan ho kar
Teerah-bakhton ki shafa'at ko sudhaare gesu

Gosh tak sunte the faryaad ab aaye taa-dosh
Ke banen khanah-badoshon ko sahaare gesu

Sookhe dhaanon pe hamaare bhi karam ho jaaye
Chhaaye rahmat ki ghata ban ke tumhaare gesu

Ka'bah-e-jaan ko pinhaaya hai ghilaaf-e-mushkeen
Ur kar aaye hain jo abroo pe tumhaare gesu

Silsilah paa ke shafa'at ka jhuke parte hain
Sajdah-e-shukr ke karte hain ishaare gesu

Mushk-boo koochah yeh kis phool ka jhaara un se
Hooriyo anbar-e-saara hue saare gesu

Dekho Qur'an mein Shab-e-Qadr hai taa matla'-e-fajr
Ya'ni nazdeek hain aariz ke woh pyaare gesu

Bheeni khushboo se mehak jaati hain galiyaan wallah
Kaise phoolon mein basaaye hain tumhaare gesu

Shaan-e-rahmat hai ke shaanah na juda ho dam bhar
Seenah-chaakon pe kuchh is darjah hain pyaare gesu

Shaanah hai panjah-e-qudrat tere baalon ke liye
Kaise haathon ne shahaa tere sanwaare gesu

Uhud-e-Paak ki choti se ulajh le shab bhar
Subh hone do Shab-e-Eid ne haare gesu

Muzhdah ho qiblah se ghanghor ghataayen umdein
Abrooon par woh jhuke jhoom ke baare gesu

Taar-e-sheerazah-e-majmoo'ah-e-kaunain hain yeh
Haal khul jaaye jo ik dam hon kinaare gesu