Chamak tujh se paate hain sab paane waale

Barasta nahin dekh kar abr-e-rahmat
Budon par bhi barsa de, barsaane waale

Madine ke khitte, Khuda tujh ko rakkhe
Ghareebon, faqeeron ke thehraane waale

Tu zinda hai, wallah! Tu zinda hai, wallah!
Mere chashm-e-aalam se chhup jaane waale

Main mujrim hoon, Aaqa! Mujhe saath le lo
Ke raste mein hain ja ba ja thaane waale

Haram ki zameen aur qadam rakh ke chalna
Are! Sar ka mauqa hai, o jaane waale

Chal uth, jabhah-farsa ho saaqi ke dar par
Dar-e-jood, ae mere mastaane waale

Tera khaayen, tere ghulaamon se uljhein
Hain munkir, ajab khaane, ghuraane waale

Rahega yun hi un ka charcha rahega
Pade khaak ho jaayen jal jaane waale

Ab aayi shafaat ki saa'at, ab aayi
Zara chain le, mere ghabraane waale