Barray lateef hain naazuk se ghar mein rehte hain

Hamaare dil mein hamaare jigar mein rehte hain
Unhein ke ghar hain yeh, woh apne ghar mein rehte hain

Yeh waqia hai libaas-e-bashar bhi dhoka hai
Yeh mojiza hai libaas-e-bashar mein rehte hain

Maqaam un ka na farsh-e-zameen na arsh-e-bareen
Woh apne chahne walon ke ghar mein rehte hain

Malaaika bhi aqeedat se dekhte hain unhein
Jo khush naseeb Nabi ke nagar mein rehte hain

Yaqeen walay kahan se chalay kahan pohnchay
Jo ahl-e-shak hain agar mein magar mein rehte hain

Khuda ke noor ko apni tarah samajhte hain
Yeh kaun log hain kis ke asar mein rehte hain

Rahein woh apnon se ghaafil arey ma’az Allah
Khush-naseeb hum un ki nazar mein rehte hain

Woh aur hi tha jo qausain par nazar aaya
Malak to apni had-e-baal-o-par mein rehte hain