Harz-e-Jaan Zikr-e-Shafa’at Kijiye

Un ke Naqsh-e-Pa pe Ghairat Kijiye
Aankh se Chhup kar Ziyarat Kijiye

Un ke Husn-e-Ba Malaahat par Nisaar
Sheeriyah-e-Jaan ki Halaawat Kijiye

Un ke Dar par Jaise ho Mit Jaaiye
Naatwaano! Kuchh to Himmat Kijiye

Pher Deejiye Panjah-e-Deew-e-La'een
Mustafa ke Bal pe Taaqat Kijiye

Doob kar Yaad-e-Lab-e-Shaadaab mein
Aab-e-Kausar ki Sabaahat Kijiye

Yaad-e-Qaamat Karte Uthiye Qabr se
Jaan-e-Mahshar par Qiyaamat Kijiye

Un ke Dar par Baithiye ban kar Faqeer
Be-Nawao! Fikr-e-Sarwat Kijiye

Jis ka Husn Allah ko bhi Bhaa Gaya
Aise Pyaare se Muhabbat Kijiye

Hayy-e-Baaqi Jis ki Karta hai Sana
Marte Dam tak Us ki Midhat Kijiye

Arsh par Jis ki Kamaanein Charh Gayeen
Sadqe Us Baazu pe Quwwat Kijiye

Neem Waa Taiba ke Phoolon par ho Aankh
Bulbulo! Paas-e-Nazaakat Kijiye

Sar se Girta hai Abhi Baar-e-Gunaah
Kham Zara Farq-e-Iraadat Kijiye

Aankh to Uthti Nahin Kya Dein Jawaab
Hum pe Be-Pursish hi Rahmat Kijiye

Uzr Badtar az Gunah ka Zikr Kya
Be-Sabab Hum par Inaayat Kijiye

Na'ra Keejiye Ya Rasool Allah ka
Mufliso! Saamaan-e-Daulat Kijiye

Hum Tumhare ho ke Kis ke Paas Jaayen
Sadqah Shahzaadon ka Rahmat Kijiye

Man Raani Qad Ra'al Haqq Jo Kahe
Kya Bayaan Us ki Haqeeqat Kijiye

Aalam-e-Ilm Do Aalam Hain Huzoor
Aap se Kya Arz-e-Haajat Kijiye

Aap Sultan-e-Jahaan Hum Be-Nawa
Yaad Hum ko Waqt-e-Ni'mat Kijiye

Tujh se Kya Kya Ae Mere Taiba ke Chaand
Zulmat-e-Gham ki Shikaayat Kijiye

Dar Badar Kab tak Phirein Khastah Kharaab
Taiba mein Madfan Inaayat Kijiye

Har Baras Woh Qaafilon ki Dhoom Dhaam
Aah Suniye aur Ghaflat Kijiye

Phir Palat kar Munh na Us Jaanib Kiya
Sach hai aur Da'wa-e-Ulfat Kijiye

Aqrabaa Hubb-e-Watan Be-Himmati
Aah Kis Kis ki Shikaayat Kijiye

Ab to Aaqa Munh Dikhaane ka Nahin
Kis Tarah Raf'-e-Nadaamat Kijiye

Apne Haathon Khud Luta Baithe Hain Ghar
Kis pe Da'wa-e-Bizaa'at Kijiye

Kis se Kahiye Kya Kiya Kya ho Gaya
Khud hi Apne Par Malaamat Kijiye

Arz ka bhi Ab to Munh Parta Nahin
Kya Ilaaj-e-Dard-e-Furqat Kijiye

Apni Ik Meethi Nazar ke Shahd se
Chaarah-e-Zahr-e-Museebat Kijiye

De Khuda Himmat ke Yeh Jaan-e-Hazeen
Aap par Waaren Woh Soorat Kijiye

Aap Hum se Barh ke Hum par Mehrbaan
Hum Karein Jurm Aap Rahmat Kijiye